Nyawoung - Dodaidi

Allah hai dododaidi
Boh gadoeng bie boh kayee uteun
Raye'k sinyak hana peu ma brie
aeb ngen keji ureung donya kheun

Allah hai dododaidang
Seulayang blang ka putoeh taloe
Beurijang raye'k muda seudang
Tajak bantu prang ta bela Nanggroe

Wahe aneuk bek ta duek lee
Beudoeh sare ta bela bangsa
Bek ta takoet keu darah ile
Adak pih mate poma ka rela

Jak loen tateh, meujak loen tateh
Beudeh hai aneuk ta jak u Aceh
Meube bak o'n ka meube timphan
Meubee badan bak sinyak Aceh

Allah hai Po illa hon hak
Gampoeng jarak han troeh loen woe
Adak na bulee uloen teureubang
Mangat rijang troeh u nanggroe

Allah hai jak loen timang preuk
Sayang riyeuk disipreuk pante'
O'h rayek sinyak yang puteh meupreuk
Teh sinaleuk gata boeh hate'